Lili'uokalani

Ko Liliʻuokalani te kuīni whakamutunga o Hawaiʻi. Ko ōna ingoa tawhito ko Lydia Kamakaʻeha, ko Lydia Kamakaʻeha Paki rānei. I ētahi wā, i mōhiotia ia hei Lydia K. Dominis.

Liliʻuokalani
Kuīni o Hawaii
Kīngitanga	20 Kohi-tātea 1891 – 17 Kohi-tātea 1893
Whakawahinga	1891
Ingoa katoa	Lydia Kamakaʻeha
Ka puta ki te ao	2 Mahuru 1838
Ka haere ki te pō	11 Whiringa-ā-rangi 1917
Kīngi tōmua	Kalākaua
Kīngi tōmuri	I hinga te Kīngitanga o Hawai'i i konei
Hoa rangatira	John Owen Dominis
Kāwai rangatira	Kāmehameha
Matua tāne	Kapaakea
Whaea	Keohokalole

Nō te 16 Mahuru 1862 i moea e ia a John Owen Dominis, Kāwana o Oʻahu rāua ko Maui. Kāhore ō rāua tamariki, he whare ngaro. Nō te matenga o tana tūngane, o Kīngi Kalākaua, i te 17 Kohi-tātea, 1891, ko te ekenga a Liliʻuokalani ki te torōna hei Kuīni. Nō muri iho mai, ka tahuri ia ki te hanga ture matua hou, he whakakaha ake i ōna mana whakahaere, he whakakaha hoki i te mana pōti o ngā iwi Māori o Hawai'i. Ka riri mai ngā Pākehā i ēnei whakaaro ōna; ka puta i konei te kaupapa whakatū kāwanatanga kē. Ko ngā kaiwhakatupu huka ētahi i pērā ai, i runga i te whakaaro whakamāmā ake ai i te hokohoko huka ki Te Hononga-o-Amerika. Nā John L. Stevens, nā te minita amerika i Hawai'i i taua wā, i tono ngā hēramana nō te kaipuke USS Boston ki uta, tiaki ai i ngā taonga o ngā kamupene amerika. Ka hinga te Kuīni i te 17 o ngā rā o Kohi-tātea, 1893, ka whakatūria he kāwanatanga hou. Nō te 4 Hōngongoi 1894, ko te whakatūranga o Hawai'i hei whenua tū motuhake, ko Sanford B. Dole te tumuaki. Mea kau ake, ka puta ngā mihi tautoko a te Kāwanatanga o Amerika. Nō te 1898, ka whakatauria e ngā pāremata e rua o Amerika kia hurihia a Hawai'i hei wāhi o Amerika.

Nō te 1895 tae noa ki te 1896, ka mauhereheretia a Liliʻuokalani i roto i ʻIolani, te whare o ngā Kīngi i Honolulu. Nō muri mai, ka puta tana kupu whakarere i te torōna mōna.

He tino kaha a Liliʻuokalani ki te tito waiata, ki te tuhituhi pukapuka. Kei tana pukapuka, Hawaii's Story by Hawaii's Queen, ngā kōrero o tōna whenua tupu. Ko te waiata rongonui i tito ai ia ko Aloha ʻOe. Ka mate ia i te tau 1917, he roro ikura. Ka mutu i konei te Kīngitanga o Hawai'i.

• 
  Kamehameha
• 
  Kamehameha II
• 
  Kamehameha III
• 
  Kamehameha IV
• 
  Kamehameha V
• 
  Lunalilo
• 
  Kalakaua
• 
  Liliʻuokalani

Hoto ki waho

• Kuīni Liliʻuokalani (reo Pākehā)

Tohutoro

• Liliʻuokalani, Hawai'i's Story by Hawai'i's Queen, ISBN 0804810664
• Helena G. Allen, The Betrayal of Liliuokalani: Last Queen of Hawaii 1838-1917, ISBN 0935180893